ချစ်ရသော ပန်းကလေးယုဇန
(၁)
မိုးလင်းမနက်
တေးသံပျံ့လွင့်လာတဲ့ ငှက်တေးသံ
နားစည်ကို ရိုက်ခတ်လေတော့
အဝေးက ချစ်သူကို လှမ်းသတိရတယ်။
ချစ်သူကိုယ်စား လာနှိုးသလား
ထင်မှတ် စိတ်ဝယ်
သံယောင်ကြား မိတဲ့ နံနက်ခင်းမှာ
ပန်းကလေးရယ်
အရမ်းလွမ်းနေမိတယ်။
အလင်းကျဆင်းတဲ့ ကာလ
မင်း အဆင်ပြေပြေ ဖြစ်ပါ့မလား အတွေး
ကိုယ်တိုင်လိုက်မပို့နိုင်သေးတဲ့ ဝမ်းရေးခရီးမှာ
ကိုယ်အတိတ်ကဆူးခဲ့ ကံ ကို ပုံချ
သက်ပြင်းနဲ့အတူ လောကကို ငေးမိခဲ့
မင်းရှိရာ မြို့ရွာအရပ်လေးဆီပေါ့။
မင်းကြိုက်တဲ့ ကော်ဖီ တစ်ခွက်
မနက်ရဲ့ အဟာရ အဖြစ်
ကိုယ်အမြဲ မဖျော်ပေးနိုင်တဲ့ ကာလမှာ
ငှက်တေးသံက
ဘဝကို ပိုနာကျင်စေခဲ့ရတယ်။
( ၂ )
ပြိုကျနေတဲ့ အလင်းထဲ
အထားသိုမှားခဲ့ ကံကြမ္မာကြောင့်
ချစ်ခြင်းများ ကောင်းကင်နဲ့မြေကြီးလို
အသံတွေသာ စီးဆင်းနေခဲ့ရ။
အချိန်မှီ သွားရတဲ့ ခရီး
အချိန်တန် မပြန်ရတဲ့ အခါ
စိတ်များ အုံးမီးဖွဲဖြစ်နေခဲ့တယ်။
ပန်းကလေးရေ
အတွေးနဲ့ ရောဂါဖြစ်မှာ စိုးရိမ်တဲ့ အခါ
ကိုယ့်ကိုကိုယ် ပဲ ဂရုစိုက်ရင်း
မင်လဲ မင်းခန္ဓာကို ဂရုစိုက်စေချင်ခဲ့တယ်။
မြို့ပြအသွားအလားက
ကမ္ဘာဦးတောသွားထက် ပိုအန္တရာယ်များလို့
အသံနဲ့ ဂရုစိုက် စိတ်ချင်းသာဆက်သွယ်နေခဲ့ရပေါ့။
( ၃ )
ပန်းကလေး
တနေ့တာ လှုပ်ရှားရုန်းကန်
အကြွေးသစ်ချ
အကြွေးဟောင်းဆပ်နဲ့
သံသရာ
ဘယ်လို ဆုတောင်းတွေ လွဲခဲ့လဲ
ချစ်ခြင်း မေတ္တာဟာ
တဒင်္ဂပျော်ရွှင်ခြင်းတွေ မဟုတ်ခဲ့ပါဘူး။
(၄)
ပန်းကလေးရေ
ကြယ်တွေ ဝေနေတဲ့ ကောင်းကင်ထက်
လမ်းပျောက်သော လမ်းမထက်မှာ
အလွမ်းတေးသာ အမြဲဆိုနေလို့။
အသိုက်မြုံအတွက် ရင်ကွဲနေရက်တွေ
ဇီဝဇိုးငှက်တစ်ကောင်က
ငါ …။
တည်ဆောက်ခဲ့သမျှ
အခြားသူတွေ အသုံးတည့်နေတာကိုပဲ
ကြံဖန်ဝမ်းသာနေရတယ်။
အလွမ်းမီးက တော့ တောက်လောင်ဆဲ။
(၅)
မြင့်မိုရ်ကျေးဇူးပေးဆပ်တဲ့ ရနံ့သာ
လောကမှာ
အသာလွန်ဆုံးပဲ ပန်းကလေး။
ဒီအတွက်
ဂုဏ်ယူလို့ မဆုံး။
အချစ်စစ်စစ်ချစ်သူဆိုတာ
တစ်ဘဝတင်မက
သံသရာထိ
ကောင်းအောင် ကြည့်ရတယ်လို့
ယုံကြည်မိတယ်
ဒီလိုနဲ့
အလွမ်းကို ချော့သပ်နေရင်း
နေထိုင်နေခဲ့ရပေါ့
ပန်းကလေး။
(၆)
ဆွတ်ဆွတ်ဖြူ နေတဲ့ ပန်းကလေး
အဆင်းရနံ့ ပြည့်စုံပါပေ့။
ပြုစုပျိုးထောင်သမျှ
စည်ပင်တင့်တယ်လှပ လို့
ကိုယ်ပျိုးတဲ့ပန်း တင့်လှနေတာ
ဘယ်ဥယျာဉ်မှူးက မပျော်ဘဲ နေမလဲ။
အလွမ်းကို မြေစာလုပ်
ကြင်နာတရားတွေ လောင်း
ရင်ခွင်တစ်ခုလုံး ဓါတ်စာပေး
စောင့်ရှောက်ခဲ့သမျှ
အခုတော့
ပန်းသဘာဝ ပန်းအလှနဲ့ တင့်တယ်နေတဲ့
ပန်းကလေးကိုကြည့်
မြတ်နိုးစွာ ပျော်နေမိတယ်။
(၇)
အရိပ်လိုချင်ကြလို့ အလွမ်းတွေနဲ့ရုန်းခဲ့
နန္တဂိုဏ်ဝင်ကို ကိုယ့်အတ္တ မတော်လှန်ခဲ့
မေတ္တာအစစ်က အေးမြမယ်လို့
ယုံကြည်ခဲ့ကြတယ်။
အချစ်စစ် အချစ်မှန်ဆိုတာ
ဆေးသားမပျက်တဲ့ ဓါတ်ပုံ။
ငါတို့တနေ့
မေတ္တာခြုံတဲ့ အိမ်ကလေး
သာယာတဲ့ ကမ္ဘာ
ပိုင်ဆိုင်ကြမှာပါ။
ယုံကြည်ခဲ့တဲ့အတိုင်း လျှောက်ခဲ့ကြတယ်
လျှောက်ခဲ့တဲ့ အတိုင်းလည်း ရောက်ခဲ့ကြတယ်။
မုန်တိုင်းတွေပြီးရင်
လေပြေလေညှင်းလေးတွေ ရှူရှိုက်ဖို့
မြေနီလမ်းကလေး မှာ လမ်းလျှောက်ထွက်ကြမယ်
ပန်းကလေး။
သိင်္ဂါလှိုင်
်
No comments:
Post a Comment